जेष्ठ नागरिकको सम्मानमा रङ्गेली नगरपालिकाको ऐतिहासिक निर्णय: सेवा प्रवाहमा विशेष प्राथमिकता अनिवार्य

पारस मण्डल

रङ्गेली, मोरङ —

रङ्गेली नगरपालिकाले अबदेखि नगरभित्र रहेका सम्पूर्ण सरकारी तथा गैरसरकारी संस्थाहरूमा जेष्ठ नागरिक, अपाङ्ग, गर्भवती, सुत्केरी तथा अशक्त व्यक्तिहरूलाई सेवा प्रवाहमा विशेष प्राथमिकता दिनुपर्ने व्यवस्था अनिवार्य रूपमा लागू गर्ने निर्णय गरेको छ।

यो निर्णय कुनै आकस्मिक कदम होइन — यसको मूल जरो २०८१ सालको माघ १३ गते सम्पन्न सार्वजनिक सुनुवाई कार्यक्रममा छ, जहाँ जेष्ठ नागरिकहरूले सेवा प्राप्त गर्न लामो लाइनमा बस्नुपर्ने बाध्यता हटाई छुट्टै लाइन र बस्ने कुर्सीको व्यवस्था मिलाइनुपर्ने सुझाव र गुनासो राखेका थिए।

उक्त गुनासोलाई संस्थागत रूपमा अघि बढाउँदै, जेष्ठ नागरिक समाजसेवा रङ्गेलीका अध्यक्ष लक्ष्मीप्रसाद मेहताको नेतृत्वमा, समाजले २०८२सालको जेष्ठ १ गते रङ्गेली नगरपालिका समक्ष औपचारिक पत्राचारमार्फत नगरभित्र रहेका सरकारी तथा गैरसरकारी कार्यालयहरूमा जेष्ठ नागरिकहरूको लागि छुट्टै व्यवस्था मिलाउन माग प्रस्तुत गरेको थियो।

 

सोही अनुरूप, २०८२ सालको जेष्ठ ८ गते, रङ्गेली नगरपालिकाले नगर क्षेत्रभित्रका सम्पूर्ण सरकारी तथा गैरसरकारी संस्थाहरूमाथि पत्राचार गर्दै उक्त माग निर्णयका रूपमा कार्यान्वयन गर्न बोधार्थ गराएको छ।

 

 

अबदेखि रङ्गेली नगरपालिकाभित्र रहेका सबै संस्थाहरूमा जेष्ठ नागरिकहरूलाई छुट्टै बस्ने व्यवस्था र सेवा लिने क्रममा अग्राधिकार अनिवार्य रूपमा लागू गरिनेछ।

यो निर्णय जेष्ठ नागरिक समाजसेवा रङ्गेलीको दूरदर्शी पहल र निरन्तर दबाबको परिणामस्वरूप सम्भव भएको हो। समाजले नगरका हजारौं जेष्ठ नागरिकहरूको आत्मसम्मान, पहुँच र अधिकारको पक्षमा जुन दृढता र निरन्तरताका साथ आवाज उठायो, त्यो अत्यन्तै सराहनीय छ।

 

अध्यक्ष लक्ष्मीप्रसाद मेहताको नेतृत्वमा समाजले सामाजिक उत्तरदायित्वको आदर्श उदाहरण प्रस्तुत गर्दै, जेष्ठ नागरिकहरूलाई सम्मानपूर्वक सेवा प्राप्त गर्न सक्ने वातावरण तयार पार्न निर्णायक भूमिका निर्वाह गरेको छ।

 

रङ्गेली नगरपालिकाको यो कदम न केवल नीति निर्माणमा जनसुनुवाईको प्रभावशाली प्रयोग हो, यो सामाजिक न्याय, करुणा र सभ्य समाज निर्माणतर्फको

ठोस पाइला पनि हो।

प्रकाशित मिति: २०२५-०५-२९ , समय : १४:००:३४ , ३ महिना अगाडि