देशभर एमालेको ‘डिजी फोर्स’ अभियान : अध्यक्ष ओलीको सुरक्षा र टोलस्तरमै जनसुरक्षा तयारी

Our Pradesh

 

काठमाडौं — नेकपा (एमाले) ले देशभर डिजिटल जेनेरेसन फोर्स (डिजी फोर्स) तथा टोल सुरक्षा समूह गठनको अभियान तीव्र पारेको छ। पार्टी अध्यक्ष केपी शर्मा ओलीको सुरक्षा तथा जेन–जी पुस्ताका मुद्दा संकलन गर्ने उद्देश्यसहित भक्तपुरको गुन्डुबाट सुरु गरिएको अभियान अहिले देशव्यापी विस्तारमा पुगेको एमालेले जनाएको छ।

 

पार्टीका पोलिटब्युरो सदस्य तथा पूर्वमन्त्री महेश बस्नेतका अनुसार, यो अभियानले न केवल अध्यक्ष ओलीको सुरक्षा सुदृढ गर्ने, तर स्थानीय अपराध नियन्त्रण र प्रहरी सहयोगमा टोलस्तरमै समन्वय गर्ने लक्ष्य राखेको छ। बस्नेतले भने, “देशभरका प्रत्येक टोलमा डिजी फोर्स गठनको काम अघि बढाइएको छ। यी समूहहरूले प्रहरीको मनोबल बढाउने र स्थानीय तवरमा शान्ति सुरक्षामा सहयोग पुर्‍याउने छन्।”

एमालेका अनुसार, भक्तपुर जिल्लामा मात्रै एक महिनामा २५ वटा डिजी फोर्स तथा टोल सुरक्षा समूह गठन भएका छन् — सूर्यविनायकका ९ वडामा ९, चाँगुनारायणमा ८, मध्यपुर ठिमीमा ६ र भक्तपुर नगरपालिकामा २।

 

फोर्सको केन्द्रीय कमान्ड अध्यक्ष ओलीको निवास गुन्डुमा स्थापना गरिएको छ, जसका संयोजक पुष्प श्रेष्ठ र सह–संयोजक अमित पौडेल तोकिएका छन्। २५ जना केन्द्रीय कमान्डअन्तर्गत र अन्य २५ जना विभिन्न जनसंगठनका प्रतिनिधि गरी ५० जना स्वयंसेवक नियमित रूपमा सुरक्षामा खटिने गरिएको छ।

 

बस्नेतले २४ भदौमा भएका तोडफोड तथा प्रहरी चौकीमाथिका आक्रमणसँग सम्बन्धित ६,३४७ वटा भिडियो क्लिप र व्यक्तिगत विवरण संकलन भएको बताएका छन्। उनका अनुसार, सरकारले विध्वंसात्मक गतिविधिमा संलग्न व्यक्तिलाई छुट दिने सम्भावना रहेकाले डिजी फोर्समार्फत ती विवरण केन्द्रीय कमान्डमा संकलन गर्ने तयारी गरिएको हो।

 

एमालेले भनेको छ — यो अभियानले जेन–जी पुस्ताको सहभागिता, स्थानीय सुरक्षा सुदृढीकरण र पार्टी नेतृत्वको सुरक्षालाई एकैसाथ अघि बढाउने दीर्घकालीन योजना तय गरेको छ।

प्रकाशित मिति: २०२५-१०-२९ , समय : १९:४५:५६ , २ महिना अगाडि