एमाले प्रतिनिधि छनोटमा दलितमाथि विभेदको आरोप
मिति: २०२५-११-२९ , समय : १८:२८:५५ , Our Pradesh
Our Pradesh
एमाले प्रतिनिधि छनोटमा दलितमाथि विभेदको आरोप
नेकपा एमालेको ११औं राष्ट्रिय महाधिवेशनका लागि प्रतिनिधि छनौट प्रक्रिया चलिरहँदा दलित समुदायमाथि जातीय विभेद भएको आरोप उठेको छ।
मोरङका एमाले नेता खेम नेपालीले प्रतिनिधि छनौटको मापदण्डले दलितलाई सीमित र संकीर्ण ठाउँमा राखेको बताएका छन्। पूर्व सांसद समेत रहेका नेपालीले फेसबुकमा स्टाटसमार्फत भने, पार्टीले वर्गीयरहित समाज र समानताको वकालत गरे पनि प्रतिनिधि छनोटमा दलितलाई अझै सीमित बनाइएको छ।
उनले भने, “दलितले दलित मात्रै चुन्न र चुनिन पाउने व्यवस्था गरिएको छ। समाजमा पानी अचल थियो भने, यसपटक मत पनि नचल्ने बनाइयो।”
यसपटक दलित प्रतिनिधि छनोटका लागि दलित मतदाता मात्रै मतदान गर्न पाउने व्यवस्था गरिएको छ। दलितहरूले खुला समूह, महिला र युवा समूहका उम्मेदवारलाई मतदान गर्न पाउँदैनन्। मतपत्र र मतपेटिका पनि छुट्टै राखिएको छ।
नेपालीले भने, “विगतमा दलित उम्मेदवारलाई सबैले भोट हाल्ने व्यवस्था थियो, तर यसपटक हामीले अरुलाई भोट हाल्न पाइनौं, अरुले हामीलाई भोट दिन पनि पाएनन्। खाली दलितले दलितलाई मात्रै भोट हाल्न पाउने व्यवस्था गरिएको छ।”
उनी यसलाई ठूलो विभेदको रूपमा लिएका छन् र खुलेर मतदान गर्ने अधिकार सीमित गरी दलितलाई विशेष घेरामा राखिएकोमा आपत्ति जनाएका छन्।
नेपालीले एमालेजस्तो माक्र्सवादी दर्शनमा आधारित पार्टीले यस्तो निर्णय गर्नु कम्युनिष्ट आन्दोलनको अपमान भएको बताए। उनका अनुसार, “अर्थराजनीतिक दृष्टिकोणले सर्वाधिक उम्दा माक्र्सवादी हाम्रो मनोविज्ञान अहिले पनि छुत/अछुत र तल्लो–उपल्लो विभेद झल्कने मानवताविरुद्ध मौन छ।”
देशभरका विभिन्न निर्वाचन क्षेत्रबाट प्रतिनिधि चयन भइरहेकाले दलित समुदायको आवाजले एमालेको समावेशी नीति र व्यवहारमाथि गम्भीर प्रश्न खडा गरेको छ।
प्रकाशित मिति: २०२५-११-२९ , समय : १८:२८:५५ , १ दिन अगाडि
